Madam

Ap bewajah pareshan si kyon hain madam

Log kahte hain to phir Theek hi kahte honge

Mere ahbab ne tahzeeb na seekhi hogi

Mere mahaul mein insan na rahte honge

Noor-e-sarmaya se hai roo-e-tamaddun ki jila

Ham jahan hain vahan tahzeeb nahin pal sakti

Muflisi his_se-latafat ko mita deti hai

Bhook adab ke sanche mein nahin Dhal sakti

Log kahte hain to logon pe ta’azzub kaisa

Sach to kahte hain ki nadaron ki izzat kaisi

Log kahte hain magar ap abhi tak chup hain

Ap bhi kahiye gharibon mein sharafat kaisi

Nek madam! Bahut jald vo daur ayega

Jab hamein zeest ke advar parakhne honge

Apni zillat ki qasam, apki azmat ki qasam

Hamko ta’azeem ke mayyar parakhne honge

Ham ne har daur mein tazleel sahi hai lekin

Ham ne har daur ke chehre ko ziya bakhshi hai

Ham ne har daur mein mehnat ke sitam jhele hain

Ham ne har daur ke hathon ko hina bakhshi hai

Lekin in talkh mubahis se bhala kya hasil

Log kahte hain to phir Theek hi kahte honge

Mere ehbab ne tahzeeb na seekhi hogi

Main jahan rahta houn insan na rahte honge