main ne jis waqt tujhe pahle pahal dekha thaa

main ne jis waqt tujhe pahle-pahal dekha thaa

Main ne jis waqt tujhe pahle pahal dekha tha

tu jawani ka koi khwab nazar ayi thi

husn ka naghma-e-javed hui thi maloom

ishq ka jazba-e-betab nazar ayi thi

Aie tarbazar-e-jawani ki pareshan titli

tu bhi ek buu-e-giraftar hai, maaloom na tha

tere jalvon mein baharein nazar ayin thin mujhe

tu sitam-khurdah-e-adbar hai, maaloom na tha

Tere nazuk se paron par ye zaro-seem ka bojh

teri parwaz ko azad na hone dega

tune rahat ki tamanna mein jo gham pala hai

vo tiri rooh ko abad na hone dega

Tune sarmaye ki chhaon mein panapne ke liye

apne dil, apni muhabbat ka lahoo becha hai

din ki tazen-e-fasurda ka asasa lekar

rat ki shokh masarrat ka lahoo becha hai

Is se kya fayda rangeen labadon ke tale

rooh jalti rahe, galti rahe, pazmurda rahe

hont hanste hon dikhave ke tabassum ke liye

dil gham-e-zeest se bojhil rahe, azurda rahe

Dil ki taskeen bhi hai asaish-e-hasti ki daleel

zindagi sirf zaro-seem ka paimana nahin

zeest ahsas bhi hai, shauq bhi hai, dard bhi hai

sirf anfas ki tarteeb ka afsana nahin

Umr bhar raingte rahne se kahin behtar hai

ek lamha jo teri rooh mein vusat bhar de

ek lamha jo tere geet ko shokhi de de

ek lamha jo teri lai mein masarrat bhar de