nakami

nakami

Main ne har chand gham-e-ishq ko khona chaha

Gham-e-ulfat , gham-e-duniya mein samona chaha

Wahi afsane miri samt rawan hain ab tak

Wahi shole mire seene mein nihan hain ab tak

Wahi besood Khalish hai mire seene mein hanoz

Wahi bekar tamannayein jawan hain ab tak

Wahi gesu miri raton pe hain bikhre bikhre

Wahi ankhein meri janib nigran hain ab tak

Kasrat-e-gham bhi mere gham ka mudawa na hua

Mere bechain khayalon ko sakun mil na saka

Dil ne duniya ke har ik dard ko apna to liya

Muzmahil rooh ko andaz-e-junun mil na saka

Meri takheel ka sheraza-e-barham hai wahi

Mere bujhte hue ahsas ka alam hai wahi

Wahi bejan irade wahi berang sawal

Wahi berooh kashakash, wahi bechain Khayal

Ah us kashmakash-e-subah-o-masa ka anjam

Main bhi nakam, miri sai-e-amal bhi nakam