Sochtaa Houn K Muhabbat Se Kinara Kar Loun

Sochtaa Houn K Muhabbat Se Kinara Kar Loun

Dil Ko Begaana-E-Targheeb-O-Tamanna Kar Loun

Sochtaa Houn K Muhabbat Hai Junoon-E-Rusvaa

Chand Bekaar Se Behooda Khyaalon Kaa Hujoom

Ek Aazaad Ko Paaband Banaane Ki Hawas

Ek Begaane Ko Apnaane Ki Sa’i-E-Mauhoom

Sochtaa Houn K Muhabbat Hai Suroor-O-Masti

Iski Tanweer Se Roshan Hai Fazaa-E-Hasti

Sochtaa Houn K Muhabbat Hai Bashar Ki Fitrat

Iska Mit Jaanaa, Mitaa Denaa Bahut Mushkil Hai

Sochtaa Houn K Muhabbat Se Hai Taabindaa Hayaat

Aap Ye Shamma’ Bujhaa Denaa Bahut Mushkil Hai

Sochtaa Houn K Muhabbat Pe Kari Shartein Hain

Is Tamaddun Mein Masarrat Pe Bari Shartein Hain

Sochtaa Houn K Muhabbat Hai Ik Afsurdaa Si Laash

Chaadar-E-Izzat-O-Naamoos Mein Kafnaai Hui

Daur-E-Sarmaayaa Ki Rondi Hui Rusvaa Hasti

Dargah-E-Mazhab-O-Ikhlaaq Se Thukraai Hui

Sochtaa Houn K Bashar Aur Muhabbat Ka Junoon

Aise Boseeda Tamaddun Se Hai Ik Kaar-E-Zuboon

Sochtaa Houn K Muhabbat Na Bachegi Zindaa

Pesh-Az-Waqt K Sar Jaaye Ye Galti Hui Laash

Yahi Behtar Hai K Begaana-E-Ulfat Hokar

Apne Seene Mein Karoun Jazba-E-Nafrat Ki Talaash

Aur Sauda-E-Muhabbat Se Kinara Kar Loun

Dil Ko Begaanaa-E-Targheebo-O-Tamanna Kar Loun