Faraar

Faraar

Apne maazi ke tassavur se hirasa houn main

Apne guzre hue ayamse nafrat hai mujhe

Apni bekar tamannaaon pe sharminda houn

Apni besood umeedon pe nadaamat hai mujhe

Mere maazi ko andhere mein dabaa rahne do

Mera maazi meri zillat ke sivaa kuchh bhi nahin

Meri umeedon kaa haasil, meri kaavish ka silaa

Ek benaam azeeyat ke sivaa kuchh bhi nahin

Kitni bekaar umeedon ka sahaaraa lekar

Maine aivaan sajaaye the kisi ki Khaatir

Kitni berabt tamannaaon ke mubham Khaake

Apne khwaabon mein basaaye the kisi ki Khaatir

Mujhse ab meri muhabbat ke fasaane na kaho

Mujhko kahne do k main ne unhein chaahaa hi nahin

Aur vo mast nigaahein jo mujhe bhool gayin

Main ne un mast nigaahon ko saraahaa hi nahin

Mujhko kahne do k main aaj bhi jee saktaa houn

Ishaq nakaam sahi, zindagi nakaam nahin

Unhein apnaane ki khwaaish, unhein paane ki talab

Shauqe bekaar sahi saie Gham anjaam nahin

Vahi gesoo, vahi nazrein, vahi aariz, vahi jism

Main jo chaahoun to mujhe aur bhi mil sakte hain

Vo kanval jinko kabhi unke liye khilna thaa

Unki nazron se bahut door bhi khil sakte hain