Khudkushi se pahle

Khudkushi se pahle

Uff ye bedard siyaahi, ye hawa ke jhonke

 Kis ko maloom hai is shab ki sahar ho k na ho

 Ik nazar tere dareeche ki taraf dekh to loun

 Doobati aankhon mein phir taabe nazar ho k na ho

Abhi roshan hain tire garm shabistaan ke diye

 Neelagoon pardon se chhanti hain shuaaein ab tak

 Ajnabi baahon ke halqe mein lachakti hongi

 Tire mahke hue baalon ki ruaayein ab tak

 Sard hoti hui batti ke dhuein ke hamraah

 Haath phaailaaye barhe aate hain bojhal saaye

 Kaun ponchhe miri aankhon ke sulagte aansoo

 Kaun uljhe hue baalon ki girah suljhaaye

 Aah ye Ghaar halaakat, ye diye ka mahbas

 Umr apni inhin taareek makaanon mein kati

 Zindagi fitrate behis ki puraani taqseer

 Ik haqeeqat thi magar chand fasaanon si kati

Kitni aasaaishein hansti rahin aivaanon mein

 Kitne dar meri javaani pe sadaa band rahe

 Kitne haathon ne bunaa atlas  o kamkhwaab magar

 Mere malboos ki taqdeer mein paiwand rahe

 Zulm sahte hue insaanon ke is maqtal mein

 Koi fardaa k tasavvur se kahaan tak bahle

 Umr bhar raingte rahne ki sazaa hai jeenaa

 Ek do din ki azeeyat ho to koi sah le

 Vahi zulmat hai fazaaon pe abhi tak taari

 Jaane kab Khatm ho insaan ke lahoo ki taqteer

 Jaane kab bikhre siya-posh fazaa kaa joban

 Jaane kab jaage sitam Khurdah bashr ki taqdeer

Abhi roshan hain tere garm shabistaan ke diye

 Aaj main maut ke ghaaron mein utar jaaoungaa

 Aur dam torti batti ke dhuein ke hamraah

 Sarhade marge musalsal se guzar jaaoungaa