Mazoori

Khalwat o jalwat mein tum mujhse mili ho baraha

Tumne kya dekha nahin, main muskura sakta nahin

Main ki mayoosi miri fitrat mein dakhil ho chuki

Jabr bhi Khud par karoun to gunguna sakta nahin

Mujh mein kya dekha ki tum ulfat ka dam bharne lagin

Main to Khud apne bhi koi kam a sakta nahin

Rooh-afza hain juunuune ishq ke naghme magar

Ab main in gaye hue geeton ko ga sakta nahin

Main ne dekha hai shikaste saze ulfat ka saman

Ab kisi tahreek par barbat utha sakta nahin

Dil tumhari shiddate ahsas se waqif to hai

Apne ehsasat se daman chhura sakta nahin

Tum miri hokar bhi begana hi paogi mujhe

Main tumhara hoke bhi tum mein sama sakta nahin

Gaye hain main ne Khuloose dil se bhi ulfat ke geet

Ab riyakari se bhi chahoun to ga sakta nahin

Kis tarah tumko bana loun main shareeke zindagi

Main to apni zindagi ka bar utha sakta nahin

Yas ki tareekiyon mein Doob jane do mujhe

Ab main sha’mae arzoo ki lau barha sakta nahin