mere geet

mere geet

Mire sarkash taraane sun ke duniyaa ye samajhti hai

Ke  shaayad mere dil ko ishq ke naghmon se nafrat hai

mujhe hangaama-e-jang-o-jadal mein kaif milta hai

miri fitrat ko khoonrezi ke afsaanon se raghbat hai

miri duniyaa mein kuchh vaq’at nahin hai raqs-o-naghme ki

miri mahboob naghmaa shor-e-aahang-e-baghaawat hai

Magar aie kaash! Dekhein vo miri pursoz raaton ko

main jab taaron pe nazrein gaar kar aansoo bahaataa houn

tasavvur ban ke bhooli vaardaatein yaad aati hain

to soz-o-dard ki shiddat se pahron tilmilaataa houn

koi khawaabon mein khawaabidaa umangon ko jagaati hai

to apni zindagi ko maut ke pahloo mein paataa houn

Main shaayar houn, mujhe fitrat ke nazzaaron se ulfat hai

miraa dil dushman-e-naghmaa-saraai ho nahin saktaa

mujhe insaaniyat kaa dard bhi bakhshaa hai qudrat ne

miraa maqsad faqat sho’laa navaai ho nahin saktaa

javaan houn main javaani lagzishon kaa ek toofaan hai

miri baaton mein rang-e-paarsaai ho nahin saktaa

Mire sarkash taraanon ki haqeeqat hai to itni hai

ke jab main dekhtaa houn bhook ke maare kisaanon ko

gharibon, muflishon ko, bekason ko, besahaaron ko

sisakti naazneenon ko, tarapte naujavaanon ko

hukoomat ke tashaddud ko, amaarat ke takabbur ko

kisi ke cheethron ko aur shahan_shaahi khazaanon ko

To dil taab-e-nishaat-e-bazm-e-ishrat laa nahin saktaa

main chaahoun bhi to kh(w)aab-aavar taraane gaa nahin saktaa!