mujhe sochne de

mujhe sochne de

Meri nakam muhabbat ki kahani mat chher

Apni mayoos umangon ka fasana na suna

Zindagi talkh sahi, zahar sahi, sam hi sahi

Dard-o-azar sahi, jabr sahi, Gham hi sahi

Lekin is dard-o-Gham-o-jabr ki vus’at ko to dekh

Zulm ki chhanv mein dam torti Khalqat ko to dekh

Apni mayoos umangon ka fasana na suna

Meri nakam muhabbat ki kahani mat chher

Jalsa-gahon mein ye vahshat-zadah sahme anboh

Rahguzaron pe falakat zadah logon ke giroh

Bhook aur pyas se paz-murdah siyah-fam zamin

Teerah-o-tar makan, muflis-o-beemar makeen

Nau’e-insan mein ye sarmaya-o-mehnat ka tazad

Aman-o-tahzeeb ke parcham tale qaumon ka fasad

Har taraf atish-o-ahan ka ye sailab-e-azeem

Nit naye tarz pe hoti hui duniya taqseem

Lahlahate hue kheton pe javani ka saman

Aur dahqan ke chhappar mein na batti na dhuan

Ye falak-bos milein, dilkash-o-seemeen bazar

Ye Ghalazat ye jhapat te hue bhooke bazar

Door sahil pe vo shaffaf makanon ki qatar

Sarsarate hue pardon mein simat te gulzar

Dar-o-deevar pe anvar ka sailab ravan

Jaise ik shayar-e-madhosh ke khwabon ka jahan

Ye sabhi kyon hai ye kya hai, mujhe kuchh sochne de

Kaun insan ka Khuda hai, mujhe kuchh sochne de

Apni mayus umangon ka fasana na suna

Meri nakam muhabbat ki kahani mat chher