Shikast

Apne Sine Se Lagaaye Hue Ummid Ki Laash

Muddaton Zist Ko Nashad Kiya Hai Main Ne

Tu Ne To Ek Hi Sadme Se Kiya Tha Do-Chaar

Dil Ko Har Tarah Se Barbad Kiya Hai Main Ne

Jab Bhi Rahon Mein Nazar Aaye Hariri Malboos

Sard Aahon Mein Tujhe Yaad Kiya Hai Main Ne

Aur Ab Jab Ke Miri Rooh Ki Pahnai Mein

Ek Sunsaan Si Maghmoom Ghata Chhai Hai

Tu Damakte Hue ‘Ariz Ki Sh’ua’ein Le Kar

Gulshudah Shama’ein Jalane Ko Chali Aai Hai

Meri Mehboob, Ye Hangama-E-Tajdid-E-Vafa

Meri Afsurdah Javani Ke Liye Ras Nahin

Main Ne Jo Phool Chune The Tire Qadmon Ke Liye

Un Ka Dhundhla Sa Tasavvur Bhi Mire Paas Nahin

Ek Yakhbasta Udasi Hai Dil-O-Jaan Pe Muhit

Ab Miri Rooh Mein Baqi Hai Na Ummid Na Josh

Rah Gaya Dab Ke Giranbaar Salasil Ke Tale

Meri Darmanda Javani Ki Umangon Ka Kharosh

Regzaron Mein Baguulon Ke Siva Kuchh Bhi Nahin

Saya-E-Abr-E-Gurezan Se Mujhe Kya Lena

Bujh Chuke Hain Mire Sine Mein Muhabbat Ke Kanval

Ab Tire Husn-E-Pasheman Se Mujhe Kya Lena

Tire ‘Aariz Pe Ye Dhalke Hue Simin Aansoo

Meri Afsurdagi-E-Gham Ka Mudava To Nahin

Teri Mahjuub Nigahon Ka Payaam-E-Tajdid

Ik Talaafi Hi Sahi  Meri Tamannaa To Nahin!