taaj mahal

Taaj Tere Liye Ik Mazhar-E-Ulfat Hi Sahi

Tujh Ko Is Vaadi-E-Rangeen Se Aqeedat Hi Sahi

Meri Mehboob Kahin Aur Milaa Kar Mujh Se!

Bazm-E-Shaahi Mein Gharibon Kaa Guzar Kyaa Mani

Sabt Jis Raah Pe Hon Satwat-E-Shaahi Ke Nishaan

Us Pe Ulfat Bhari Ruhon Kaa Safar Kyaa Mani

Meri Mehboob Pas-E-Pardaa-E-Tash_Heer-E-Vafaa

Tu Ne Satwat Ke Nishaanon Ko To Dekhaa Hotaa

Murdaa Shaahon Ke Maqaabir Se Behalne Vaali

Apne Taareek Makaanon Ko To Dekhaa Hotaa

Anginat Logon Ne Duniyaa Mein Muhabbat Ki Hai

Kaun Kahtaa Hai Ki Saadiq Na The Jazbe Un Ke

Lekin Un Ke Liye Tash_Heer Kaa Saamaan Nahin

Kyun Ke Vo Log Bhi Apni Hi Tarah Muflis The

Ye Imaaraat-O-Maqaabir Ye Faseelen, Ye Hisaar

Mutla-Qulhukm Shahanshaahon Ki Azmat Ke Sutun

Daaman-E-Dahar Pe Us Rang Ki Gulkaari Hai

Jis Men Shaamil Hai Tire Aur Mire Ajdaad Kaa Khun

Meri Mehboob! Unhein Bhi To Muhabbat Hogi

Jinaki Sannaa_I Ne Bakhshi Hai Ise Shakl-E-Jameel

Un Ke Pyaaron Ke Maqaabir Rahe Benaam-O-Namud

Aaj Tak Un Pe Jalaa_I Na Kisi Ne Qandeel

Ye Chamanzaar Ye Jamunaa Kaa Kinaaraa Ye Mahal

Ye Munaqqash Dar-O-Deevaar, Ye Mehraab Ye Taaq

Ik Shahanshaah Ne Daulat Ka Sahaaraa Le Kar

Ham Gharibon Ki Muhabbat Kaa Uraayaa Hai Mazaaq

Meri Mehboob Kahin Aur Milaa Kar Mujh Se!