yaksooi

Ahd-E-Gumgashtaa Ki Tasveer Dikhaati Kyon Ho?

Ek Aawaara-E-Manzil Ko Sataati Kyon Ho?

Vo Hasin Ahd Jo Sharmindaa-E-Ifaa Na Huaa

Us Hasin Ahd Ka Mafhoom Jataati Kyon Ho?

Zindagi Sho’lah-E-Bebaak Banaalo Apni

Khud Ko Khakistar-E-Khaamosh Banaati Kyon Ho?

Main Tasawwuf Ke Maraahil Ka Nahin Houn Qaa’il

Meri Tasveer Pe Tum Phool Charaati Kyon Ho?

Kaun Kahtaa Hai K Aahein Hain Masaa’ib Ka Ilaaj

Jaan Ko Apni ‘Abas Rog Lagaati Kyon Ho?

Ek Sarkash Se Muhabbat Ki Tamannaa Rakh Kar

Khud Ko Aa’in Ke Phandon Mein Phansaati Kyon Ho?

Main Samajhtaa Houn Taqaddus Ko Tamaddun Ka Fareb

Tum Rasoomaat Ko Eemaan Banaati Kyon Ho?

Jab Tumhein Mujh Se Zyadaa Hai Zamaane Ka Khayaal

Phir Miri Yaad Mein Yuun Ashk Bahaati Kyon Ho?

Tum Mein Himmat Hai To Duniyaa Se Baghaawat Kar Lo

Varnaa Maan-Baap Jahaan Kahte Hain Shaadi Kar Lo